Ok dit Johr hebbt wi vun´n Heimatvereen wedder wat för de Kinner op de Been stellt.
An´n Sünnavend, 16. Juni 2018 weern twölv Kinner to Gast bi Familie Thordsen op den Koloniehoff in Rickel (Rickling). De Nameddag stünn ünner dat Motto „Rund üm de Melk“. Dat güng los mit en Rundgang över den Hoff. Anke Thordsen hett de Ställe för de Kalver, dat Jungveeh un de Köh wiest. De ganz lütten Kalver „wahnt“ in en Iglu. Jeden Kalv kriggt en „Personalutwies“ mit en Nummer. Disse Nummer steiht ok op de Ohrmark, de dat Kalv binnen hett. Wenn dat grötter is un villicht mal verköfft warrt, denn warrt ok de Utwies mitgeven.
Kloor mütt de Tieren ok wat freten. In en Futtermischwagen warrt Gras- un Maissilaage, Soja- un Maisschroot vermengeleert. För de Kalver gifft dat noch Kraftfutter. To Melkertiet güng dat mit in den Melkstand. Dor hebbt de Kinner bi´t Melken tokeken. Un se dörven ok mal sülvst melken.
Vun so veel ümhergahn, tohören und utprobeern warrt een denn ok hungerig. Dorüm hebbt wi mit de Kinner en beten wat to eten maakt. Allens natürlich mit Melk. Dat geev Joghurt mit Honnig un Himbeeren un sülvst backt Waffeln. Wenn een Sahne in en Marmeladenglas lang noog schüddelt, denn gifft dat Bodder. Mit en beten Salt un Krüder weer dat richtig lecker op so´n Stück Bageutte. To´n Afsluss wörr tosamen noch dat Leed vun Buer Bernd sungen. Un nich blots de Kinner harrn veel Spaaß an dissen Nameddag.

De twete Veranstalten weer ok an en Sünnavend Nameddag, neemlich an´n 22. September 2018. Ditmal hebbt wi wedder mit twölv Kinner dat Museum in Westeraad besöcht. Dieter Harfst hett uns dörch dat Museum föhrt. Un wat dat dor allens to sehen geev. Wat ut de Vörtied, en Schoolstuuv, en Börgermeesterstuuv, de Köök un de Waschköök, en Slaapstuuv un en Laden. De Kinner kunnen veel bekieken un dörvten allens anfaten un utprobeern. Worüm hett en Telefon en Kurbel un keen Tasten? Wat maakt en Frollein vun´t Amt? Worüm hebbt de Kinner so komisch schreven fröher? Un wat is en Tefifon? Dat weer richtig spannend. Na en lütte Paus mit Plätten un Appelsaft geev dat en Fraagbogen. In dree Gruppen müssen de Kinner över twintig Fragen beantworten. To´n Sluss müss noch en Schatzkist opmaakt warrn, man dat weer gor nich so eenfach. De Belohnung för de Kinner weer en leckern Saft, de in de Kist weer. De schöönste Belohnung för uns weer de Fraag vun en Deern. „Wann macht ihr das wieder?“

Inlaad weern to disse Veranstalten all Grundschoolkinner ut den Kreis Sebarg. Dorför weern leider wenig Kinner dor. Man de harrn jüst so as wi veel Spaaß. Un wi warrt nich nalaten, wat för de Lütten antobeden.

De Jugendutschuss
Irmtraut Falck, Fiete Hamburg, Peter Stoltenberg, Anke Thordsen un Petra Wede

En Dag op Platt för Kinner

„Mit Plattdüütsch lockst du keen Göör mehr achter´n Aven rut.“ Wo sik letzt Johr för den plattdüütschen Theaternameddag blots dree Kinner anmeldt´ harrn, kunn een dat woll menen. Dat direkte Anschrieven an de Scholen, üm de Inladen an de Kinner wiedertogeven, harr op jeden Fall keen Erfolg.

Man wo kaamt wi nu an de Kinner ran? Hölpen kunn villicht dat Schoolamt. Wenn de för uns de Inladen an de Scholen schickt, denn hett de Saak en beten offizielleren Charakter. Dat hebbt sik Irmtraut Falck, Friedrich Hamburg, Peter Stoltenberg, Anke Thordsen un Petra Wede vun´n Jugendutschuss dacht´. Un so weer dat ok. Wo wi anners mit Möög 25 Kinner för den „Dag op Platt“ tosamen kregen hebbt, harrn wi nu dicht an 80.

Dor wörrn wi denn doch en beten bang: Passt dat mit 80 Kinner op den Zeltplatz, wenn de ok noch anner Gruppen dor hebbt? Wi bruukt mehr Personal un mehr Material. Denn de Kinner in ehr Projektgruppen indelen un oppassen, dat se mit ehr Frünnen in en Grupp kaamt. Kieken, wat se villicht Allergien hebbt, wat nich allens eten dörvt un wat se in de Zeitung ok mit op dat Foto dörvt.

All dat harr wi in´t Oog, as dat an´n 13. Mai 2017 denn losgüng mit den „Dag op Platt för Kinner“ de nu al dat drütte Maal op den JugendZeltplatz Wittenborn stattfunnen hett.

Ut fief naturkundliche Projekte kunnen de Kinner sik twee utsöken – een an´n Vörmeddag un een an´n Nameddag. Un den ganzen Dag schullen se blots Plattdüütsch op de Ohren kriegen. Dor kunnen se basteln mit dat, wat een in´n Knick so finnen kann, Talglichter dreihen un Hotels för Wildimmen buen, ut en Dannenboomspitz en Quirl snitzen, Nistkassens buen un mit Wildkruut kaken un backen.

Bevör dat in de Projektgruppen losgüng, geev dat to´n Begröten dat Leed „Moin Moin, leve Lüüd“, dat en poor Kinner al ut de School kennt un dat al Traditschoon hett op den „Dag op Platt“. Mit veel Lust, Spaaß un mal mehr un mal weniger Konzentratschoon güng dat denn an de Arbeit.

Mit Bernd Thordsen un Peter Stoltenberg kunnen de Jungs un Deerns Dannenboomspitzen mit en Mess afschrubben bit blots noch dat witte Holt överbleev. Keeneen harr dacht, dat ut de pieksige Spitz en schönen, witten Quirl warrn kunn. Mit so en Mess mutt een aver fix oppassen. Dat hebbt en poor Kinner to spören kregen un wi müssen Plaaster för de Finger verdelen.

En lütte Landschaft in en Schohkarton oder en Windlicht ut en Marmeladenglas hebbt Irmtraut Falck un Steffi Ahrens mit de Lütten bastelt. Dor wörrn Steen, Sand, Blääd und lütte Knüppels to bruukt.

Renate Ehlers, Imkerin ut Groot Niendörp, hett wiest, wo Talglichter ut Wassplatten dreiht warrt. Aver de Kinner hebbt ok wat Godes för de wilden Immen daan: Mit de Hölp vun Karen Ahrens, Werner Fölster un Peter Ehlers hebbt se Insektenhotels buut. Fiete un Kuddel Hamburg hebbt mit de Kinner Nistkassens klütert, bet meist keen Schruuv mehr över weer.

Bi´t Kaken un Backen mit Anke Thordsen un Petra Wede weern de Rezepte op Platt. Keen Problem för de Kinner. Den Krüderquark un de Krüderbotter, de Krüderwaffeln un Krüderrundstücken geev dat to´n Afsluss för alle to´n Probeern.

Den ganzen Dag över hebbt de Deerns un Jungs Platt höört. Kloor hebbt se op Hoochdüütsch antwoort. Man nich eenmal hebbt se „Was?“ oder „Hä?“ seggt. Se kunnen allens vertsahn. So vele anmeldte Kinner wiest uns, dat de nedderdüütsche Spraak ok bi de Öllern wedder good ansehen is un lött uns hoffen för de neegsten Veranstalten.

Tschüüs seggt wörr wedder mit en Leed: „De Dag is vörbi, hett Spaaß maakt mit di. Wi hebbt en Barg schafft, jo, wi hebbt en Barg schafft.“
Dor weern de Kinner, de Lüüd vun´n Jugendutschuss un all de flietigen Hölpers sik eenig!
Petra Wede